Rio Reiser Festival 2007 uun Fresenhagen

rioreiserA 18. august hee a Rökefloose tup mä Friisk Foriining en fresk rock-konsert ütjracht am muar jong lidj uun Nuurdfresklun mä fresk rock-musiik bekäänd tu maagin. Detdiar konsert wiar dial faan det widjhen bekäänd Rio-Reiser-Sommerfestival, wat faan a 17.-18. august uun Fresenhagen wiar.
Fresk musiksköölen san jo ei so auermiatig bekäänd an wurd faan a medien uk ei so beaachtet üüs dönen, wat üüb ingelsk of tjiisk schong an tji diaram uk ei soföl lidj uun. Sodening wiar dön bial fresk ferianer bliis, det detdiar konsert mä uun’t program faan det somer-festival mä apnimen wurd küd, wat arkes juar tu iaren faan de 1996 uun Fresenhagen stürwen musiiker Rio Reiser trochfeerd wurd.
Widjert de freidai inj, üüs leewen, faan dön Rio-Reiser-hüs-lidj musik för en auerregjonaal publikum presentiaret wurd, sted de saninj oner det auerskraft „Tag der friesischen Rockmusik“ an wurd faan a Rökefloose ütjracht. Dediar inj san uun’t gehial 3 bands ütj at fresk amfial aptreeden. Tau diarfaan soong rian üüb fresk (Lembek) of tu’n dial (Ludwig Van). Fööraal „Ludwig Van“ as oner’t jong lidj uun hial Tjiisklun ei gans ünbekäänd, auer jo bi muar bundeswidj „Nachwuchswettbewerbe“ uun’t finaale stenen haa.
Uun’t gehial wurd det Rio-Reiser-Sommerfestival faan sowat en 500 fans ütj Nuurdfresklun an hial Tjiisklun besoocht, huarmä dön organisatooren gud tufrees wiar.
Üübtu hed dön fresken a mögelkhaid, jam mä en info-stand lik üüb sidj faan a hauptiingung an uun en reede tup mä Reiser san bruler at publikum tu presentiarin.
At san uk bi alerlei steeden uun’t Rio Reiser hüs info-skäälten apstääld wurden, huar ham wat am a kultüür an a spriak faan a fresken tu weden fu küd. Hü gud döndiar informatjuunen am a fresk manerhaid do uunnimen wurden san, hee altermaal wonert. Sodening kön ham sai, det det ham rocht woor luanet hee, det fresk rock-konsert mä det Rio-Reiser-Sommerfestival 2007 tu ferbinjen.

Comments are closed.