JEV-manschne säke pooscheoie önj Christianslyst

Osterseminar2011Tu poosche lååsiden e SDU-manschne tut teema „The Streets of Voluntariness“ eefter Christianslyst. Uk dåtheer tooch wjarn er wi maning gödj kånde jef-manschne ma bai, ouers uk naie lasmoote sü as et Vlach Youth Council üt Albaanjen köö huum begrööte. Et program häi for arken smååge wat paroot. For da waane foon e sport jäif et en latj olümpjaade, wat for ordi stiming sörid heet. Än wat huum uk ferjeese mötj: Da wikingerspaale, weer di leeste een enarken iinjsen ma pil än flitsbooge schiitje schölj. Dadeere, wat hål spaale, kömen bait grut ferspaalen aw jare koostinge. E Rökefloose köö sügoor en påår foon e prise ma tuhüs naame. E ütfluuch gäng eefter Flansborj. Bai moi uurswääder wus en tuur döör e stää unti en glees biir bütefor möölik. Di ålwriere påårt bestöö üt e grut iirsfersoomling foon e JEF. Jenny Jürgensen wörd as eefterfülier foon Momme Nommensen wääld. Südänji köö e sat as stääfertreesene formoon unti -wüset foon e JEV for e nordfrasche hülen wårde. We seede Mommen foole tunk for san inseet än sin gou kontaktårbe. We froie üs ma Jenny än wansche har foole erfålg än uk heelp foon oudere.
Dan jäif et nuch tra årbesfloose, weer et forålem deeram gäng, hü huum önj floose möölikst efäktiif tuhuupe årbe koon. Et fordreegen foon Prof. Bjarne Ibsen fülid mat teema „Wat bedjüset et iireåmt?“ et motto foont pooscheseminåår.
Önj e fritid köö följk sin häi ma gratis biir fine unti di hotdog-woin besäke. For åle uler ferjin blaft di foon e Rökefloose infläägene „Schüttelköm“, wat aw e sünåmde exchange market ma erfålg inseet wörd.

As resultoot koon huum seede: Chrsitianslyst – iireåmt – hotdogs – suuper

Comments are closed.