Güle güle – en nordfrasch foomen önj Istanbul

istanbulManerhäide önj e Türkai, stormmoune 2010

Twasche Euroopa än Asien lait e kultuurhoodstää 2010: Istanbul. Kaotiisch än ploonlüüs präiwe miljoone manschne än släng jam döör e banestää. Än mad deer bane ferseecht en latj nordfrasch wüset än fin har turuchte. Suner gruten erfålg. Aa….deer kamt ål di „tjüsche“ türke tu heelp än bestalt for üs tou gleese ma türkiische tee. Wilems schint et, as wan e türke nuch mör tee drainke, as da ååstfrasche, dåt bloot sü tubai. Såchtetseelew, di tee schal gau drunken wårde, ouerdåt we en tacht program hääwe.
E jöögedütprung ma tjüsche gödjkånde manerhäide än sotsjaale än religjööse manerhäide wårt stiped foont åmt for bütenlönjsche keere (AA), Berliin, än organisiird foon e „Bürger e.V.“. Ik fluuch ma 11 jöögedlike önjt foon 17 bit 28 üt Berliin, wilt e ouder haleft foon Frankfurt önjräised.
Önjt program stöön t.b. besäke bait Goethe-Instituut, tjüsch generaalkonsulaat, e griichiisch-ortodåks schörk, e jöösiisch gemiinde, e alewiite än bait armeensch blees „AGOS“. Üüsen floose as ordi bröket. Tubai da ofitsjäl gödjkånde natsjonaale manerhäide san uk inofitsjäle manerhäide fertrin, sü as t.b. türke üt Tjüschlönj, homoseksuäle unti jööse. Müülj as et, dåt jam da jöögedlike üt Tjüschlönj, wat tu en manerhäid hiire, ma e manerhäide önj e Türkai ütenouder seete än naie kontakte ai bloot önj e Türkai, ouers uk önj Tjüschlönj apbage koone.
Kort säid: En waag ma maning naie indruke, weer ai bloot impulse foon büte kömen, ouers uk e dialoog banefor e floose seecht än uk fünen wörd. Iir ik et ferjees, önj e seelew waag wus uk e tjüsche bundespräsident Wulff önj e Türkai.
Fulpåked ma türkiische tee, raki än maning indruke ferleet ik e metropoole, weer 12 miljoone manschne laawe, – suner hooddük.
Da geestfründlike türke sään natöörlik aw türkiisch årt än wis adiis: Adiis, we siie enouder wi, mak heer, mak deer, ‚Yakında görüşmek üzere‘ Istanbul!

Comments are closed.