Et Ailönj teelt…

oomram…än 13 junge nordfrasche än nordslaswikere füliden än kjarden for 5 deege eeftert oueremätje smuk ailönj Oomram. We boogeden önj en jöögedherbärje made twasche e düüne, mån hu meeter wach foon e strönj. Tu üüs program hiird en lung fiiljtuur ma en ruchten Öömranger, wat üs åles wised, wat aw sin ailönj sü tu schüns as. Än åltens leet hi goue än interäsante kulturäle än histoorische äädergüne ma infliitje. En wideren huugepunkt foon dadeere deege wus et heefluupen foon Oomram eeftert näiberailönj Feer, en tuur foon süwat 8 km. Üüsen heeffäärer ferteeld üs deerbai sü ålerhånd amt wråålsnatöriirwe. Ouers et wichtist, wat´r üs baibroocht heet, wus „Augen auf beim Wattenlauf!“, än sü kömen we åltemååle suner ferlüste än suner grute malööre aw Feer önj. Da nordslaswikere liirden en nordfriisk spal, et sünåmd gibseln, än et jäif matiinjs hiitje weedstride bai e strönj, natörlik uner e uugene foon hu ferwunerde feeriegeeste. Oofting sätjen we uk bloot baienouder än hääwe snååked än üs wat näre kåneliird. Enarken fäild ham samerlik lacht, wat for ålem mat moi wääder tu douen häi, sü dat we åål e wråål bütefort ailönj ferjätjen. As en gåns besuner kröön köön we bait bååsen made önj e nacht et siijåchten belaawe. Åleweegens trinam üs glanerne alge än ouer üs e stäärehamel. Dåt leet üs nuch iinjsen smeele än diip inoome, iirt dan di läädere däi tubääg eefter e fååstewål gäng – tubääg önj e warkeldäi.

Comments are closed.